МЭНДЧИЛГЭЭ

Эзэн Чингис хааныхаа алтан ургийн хаадын гал голомтыг өвлөсөн, эрдэм оюуны охь манлай болсон тост Боржигоны бор толгод дунд ажиллаж, амьдарч, уурхайн хотоо сүндэрлүүлж, эх орныхоо галын бурхадыг ивээж яваа Шивээговьчууд та бүгдийнхээ амар мэндийг айлтган мэндчилье.

Он цаг улиран илэх тутам улам бүдгэрэх, он цагийн мөрийг өнөөгийн бидэн өөрсдийн боломжоор тодруулан алдаршуулж, үр ач хойч үе маань залгамжлан дээдлэх учиртай. Аливаа цаг мөч бүхэн нэгэн түүхийн эхлэл, нэгэн түүхийн төгсгөл байдаг.

Шивээговь сумын иргэдийн Төлөөлөгчдийн Хурал найм дахь удаагийн сонгуулийн үр дүнгээр байгуулагдан, бүрэн эрхийнхээ хугацаанд гүйцэтгэх засаглал, төрийн болон төрийн бус байгууллага, аж ахуйн нэгжүүд, иргэдтэйгээ хамтран сум орон нутгийнхаа хөгжлийн төлөө, тулгарч байгаа асуудлыг үе шаттай шийдвэрлэн ажиллаж байна.  

Шивээговь сумын маань нүүр царай сүүлийн жилүүдэд эрс өөрчлөгдөн, бүтээн байгуулалтын ажил хөдөлмөр эрч хүчтэй өрнөж, иргэдэд төрийн үйлчилгээг түргэн шуурхай, хүртээмжтэй хүргэх боломжийг сайжруулсаны үр дүнд оршин суугчдын ая тухтай, сэтгэл хангалуун амьдрах, ажиллах орчин, нөхцөл нэмэгдүүлж буйд нутгийн өөрөө удирдах байгууллагын үе үеийн эрхэм хүндэт төлөөлөгч та бүхний үүрэг, оролцоо нэн чухал байсныг онцлон хэлэхийг хүсч байна.

Иргэдийнхээ ая тухтай орчинд амьдрах нөхцөлийг бүрдүүлэх чиглэлээр хэрэгжүүлж буй төсөл, хөтөлбөр, санал санаачлагыг дэмжин сумынхаа хөгжил цэцэглэлтийн төлөө хамтдаа хөдөлмөрлөж буй Шивээговь сумын нийт иргэдийн төлөөлөл болсон төлөөлөгч нартаа болон хөдөлмөрч ард түмэндээ мэлмий тунгалаг, өлмий бат оршин, өрнүүн их ажил үйлсэд тань өндөр амжилт хүсэхийн ялдамд эрүүл энх, саруул ухаан, дундрашгүй эрч хүчийг хүсэн ерөөе.

ГОВЬСҮМБЭР АЙМГИЙН ШИВЭЭГОВЬ СУМЫН

                                                  ИРГЭДИЙН ТӨЛӨӨЛӨГЧДИЙН ХУРЛЫН ДАРГА А.ДЭЛГЭРЗАЯА